کرک: خفیہ اطلاع پر آپریشن ، پولیس کے ساتھ مقابلے میں ایک دہشتگرد ہلاک‘ اہلکارزخمی

کرک (نوائے وقت رپورٹ) دہشت گردوں کی موجودگی کی خفیہ اطلاع پر سرچ آپریشن کے دوران پولیس کے ساتھ مقابلے میں ایک دہشت گرد ہلاک جبکہ ایک اہلکار زخمی ہو گیا۔ کرک سٹی پولیس کو خفیہ ذرائع سے اطلاع موصول ہوئی کہ علاقہ ڈھب حکیم خیل میں کچھ دہشت گرد عناصر موجود ہیں جو کسی بھی وقت تخریب کاری کی کوشش میں ہیں۔ تھانہ کرک سٹی کے ایس ایچ او گھروں کے سرچ آپریشن میں مصروف تھے کہ ایک گھر سے پولیس پارٹی پر اندھا دھند فائرنگ ہوئی جس کے نتیجے میں پولیس کا ایک اہلکار گولی لگنے سے زخمی ہوا۔ پولیس نے زخمی اہلکار کو طبی امداد کیلئے ہسپتال منتقل کیا اور ملزمان کی تلاش شروع کی تو دوبارہ پولیس پر فائرنگ ہوئی جس پر جوابی کارروائی کی گئی۔ فائرنگ کے بعد پولیس کو سرچ کے دوران ایک ہلاک شدہ لاش ملی۔ نعش کے جیب سے ڈرائیونگ لائسنس کے ذریعے حفیظ اللہ والد پشم خان سکنہ بورہ خیل شمالی وزیرستان سے شناخت ہوئی۔ پولیس نے ملزم کیساتھ موجود ایک کلاشنکوف معہ ایمونیشن بھی قبضہ میں لے لی۔