لاہور (نامہ نگار) شہر کے مختلف علاقوں میں ڈاکوؤں اور چوروں نے چوری و ڈکیتی کی درجنوں وارداتوں میں متعدد شہریوں سے لاکھوں روپے مالیت کی نقدی، طلائی زیورات، موبائل فون، موٹر سائیکلیں، گاڑیاں اور دیگر سامان لوٹ لیا ہے۔ تفصیلات کے مطابق ڈاکوؤں نے گلشن اقبال کے علاقے میں فواد اور اس کی فیملی کو گن پوائنٹ پر یرغمال بنا کر ساڑھے 5 لاکھ روپے مالیت کی نقدی، طلائی زیورات اور موبائل فون، نصیر آباد کے علاقے میں نواز سے 4 لاکھ 10 ہزار روپے اور موبائل فون، کوٹ لکھپت کے علاقے میں فواد سے 3 لاکھ 5ہزار روپے اور موبائل فون، ہنجروال کے علاقے میں ایان سے گن پوائنٹ پر70ہزار روپے اور موبائل فون، چوہنگ کے علاقے میں طاہر سے 55ہزار روپے اور موبائل فون، باٹا پور کے علاقے میں احمد سے40 ہزار روپے اور موبائل فون، جنوبی چھاؤنی کے علاقے میں دستگیر سے 35ہزار روپے اور موبائل فون، قلعہ گجر سنگھ کے علاقے میں صابر سے 15ہزار روپے اور موبائل فون، شاہدرہ کے علاقے میں ارسلان سے 14ہزار نقدی اور موبائل فون لوٹ لیا اور فرار ہوگئے ہیں۔ چوروں نے ٹاؤن شپ کے علاقے میں تنویر کی دکان کے تالے توڑ کر 4 لاکھ روپے مالیت کی نقدی اور سامان چوری کر لیا ہے۔ چوروں نے گلبرگ، فیصل ٹائون اور ڈیفنس کے علاقوں میں سے تین گاڑیاں، لٹن روڈ کے علاقے سے رکشہ جبکہ سبزہ زار، داتا دربار، نولکھا، راوی روڈ، مانگا منڈی، گجرپورہ، ساندہ اور مصری شاہ کے علاقوں میں سے آٹھ موٹر سائیکلیں چوری کر لی ہیں۔