لاہور (سپورٹس رپورٹر) قومی جونیئر انڈر 21 ہاکی چیمپئن شپ 2013ءمیں نیشنل بنک، پی آئی اے، سوئی گیس اور واپڈا کی ٹیموں نے کوارٹر فائنلز میچز میں اپنی حریف ٹیموں کو شکست دیکر سیمی فائنل کے لئے کوالیفائی کر لیا۔ فیصل آباد ہاکی سٹیڈیم میں ٹورنامنٹ میں گذشتہ روز کوارٹر فائنل میچز کھیلے گئے پہلے میچ میں سوئی سدرن گیس کمپنی نے پنجاب وائٹ کو دو ایک سے مات دی۔ دوسرے میچ میں واپڈا نے آرمی کے خلاف چھ ایک سے کامیابی حاصل کی۔ فاتح ٹیم کی جانب سے عدنان دو گول کے ساتھ نمایاں رہے۔ تیسرا میچ پی آئی اے اور پنجاب کلر کے درمیان کھیلا گیا جس میں پی آئی اے نے پنجاب کی ٹیم کو دو ایک سے ہرایا۔ چوتھے میچ نیشنل بنک نے کسٹمز کو سات تین سے شکست دی۔ بنک کی جانب سے ایوب علی اور کاشف جاوید نے دو دو گول سکور کئے۔