لاہور ( سپورٹس رپورٹر )کامن ویلتھ چیمپئن انعام بٹ دیسی کشتی میں شیر پاکستان بن گئے، ٹائٹل فائٹ میں عمیر پہلوان کو سات منٹ میں چت کردیا ۔نوجوان قومی ریسلر انعام بٹ کی کامیابیوں کا سلسلہ جاری ہے۔ انعام بٹ نے عمیر پہلوان کو شکست دیکر دیسی کشتی میں ملک کا دوسرا بڑا ٹائٹل شیر پاکستان مقابلہ جیت لیا۔ پنجاب سٹیڈیم میں ہونیوالے دیسی کشتی کے مقابلے میں مجموعی طور پر چالیس مقابلے کرائے گئے تاہم ٹائٹل فائٹ مقابلے کو دیکھنے کیلئے ہزاروں کی تعداد میں شائقین پنجاب سٹیڈیم میں امڈ آئے۔ ٹائٹل فائٹ میں انعام بٹ نے حریف پہلوان کو صرف سات منٹ میں شکست دیدی۔ میڈیا سے گفتگو کرتے ہوئے انعام بٹ نے شکوہ کیا کہ ملک کا دوسرا بڑا ٹائٹل جیتنے پر صرف ایک لاکھ روپے کا انعام ناکافی ہے، قومی چیمپئن نے کہا کہ وہ کامن ویلتھ اور ورلڈ ریسلنگ چیمپئن شپ میں پاکستان کیلئے ٹائٹل جیت چکے ہیں تاہم اب کامن ویلتھ ریسلنگ مقابلوں میں بھارت کیخلاف کھیلنے کیلئے ٹریننگ میں مدد نہیں کی جارہی۔ انعام بٹ نے حکومت نے سے مطالبہ کیا کہ ایونٹ کی تیاریوں کیلئے دو ماہ کیلئے پاکستانی پہلوانوں کو ایران میں ٹریننگ دی جائے تو بھارت کیخلاف ٹائٹل جیت سکتے ہیں۔