الیکشن میں امن و امان ‘ضلع شیخوپورہ سے 226 کلاشنکوفوں سمیت 830 مختلف بور کی گنز پکڑی گئیں 

لاہور(نامہ نگار) امن و امان کی فضا برقرار رکھنے کیلئے شیخوپورہ پولیس نے الیکشن سے قبل ضلع بھر میں گرینڈ آپریشن کیا اور الیکشن لڑنے والے اور انکے حامیوں سے بڑی مقدار میں اسلحہ پکڑ لیا ہے ، آر پی او شیخوپورہ بابر سرفراز الپا نے بتایا کہ شیخوپورہ  پولیس نے کریک ڈاؤن کے دوران 226 کلاشنکوفوں سمیت 830 مختلف بور کی گنز پکڑ لیں۔ پولیس ٹیموں نے 770 افراد کیخلاف مختلف دفعات کے تحت مقدمات بھی درج کئے۔ الیکشن کو پرامن بنانا پولیس کی ذمہ داری ہے اور شیخوپورہ ریجن کے تمام اضلاع میں الیکشن کمیشن کے ضابطہ اخلاق پر عمل درآمد یقینی بنایا جا رہا ہے، اسلحہ کی نمائش پر سخت پابندی عائد ہے اور الیکشن کے دنوں میں کسی کو ہلڑ بازی کی اجازت نہیں دیں گے۔