پیپلز پارٹی غریب کے دل کی آواز، تنخواہوں میں 100 فیصد اضافہ کیا: زرداری

تلہ گنگ ( میاں محمد ملک +نوائے وقت رپورٹ) سابق صدر اور پاکستان پیپلز پارٹی پارلیمینٹیرینز کے صدر آصف علی زرداری نے کہا ہے کہ پیپلز پارٹی غریب کے دل کی آواز کو سمجھتی ہے۔ تلہ گنگ میں انتخابی مہم کے حوالے سے جلسہ سے خطاب کرتے ہوئے کہا کہ مجھے اپنے بیٹے بلاول پر فخر ہے۔ ہم نے غریبوں کی مدد کیلئے بینظیر انکم سپورٹ پروگرام شروع کیا۔ اس پروگرام کا ہمیں کسی نے نہیں کہا لیکن ہمیں غریبوں کی حالت کا علم ہے۔ ہماری حکومت میں اتنی غربت نہیں تھی جو موجودہ دور میں ہے۔ ہمیں الیکشن مہم کا صرف 2دن کا وقفہ ملا ہے۔ ان دو دنوں میں الیکشن کی تیاری کر رہے ہیں۔ جس طرح آپ لوگوں نے کم وقت میں اطلاع پر جلسہ میں شرکت کی، اس کیلئے "آئی لو یو" ۔ مجھے اس بات کا بھی بخوبی اندازہ ہے کہ تلہ گنگ میری طرف دیکھ رہا ہے۔ ہمیں تلہ گنگ بچانے کے ساتھ یہاں سوئی گیس اور پینے کا صاف پانی مہیا کرنا ہے۔ ہم نے اپنے دور میں تنخواہوں میں100فیصد اضافہ کیا۔ آج جتنی مرضی تنخواہیں بڑھا دیں گزارہ مشکل ہو رہا ہے۔ انہوں نے مزید کہا کہ الیکشن جیت کر تلہ گنگ کی پسماندگی دور کرنے کیلئے یہاں کے مقامی انتظامی افسران کی تعیناتی کرائیں گے، جو مسائل سمجھتے ہوں تاکہ یہ ضلع بھی ترقی کرے اور شہریوں کو بنیادی سہولیات فراہم ہوں۔