پاکستان سپرلیگ9ٹکٹوں کی آن لائن فروخت کل سے شروع

لاہور ( سپورٹس رپورٹر) پاکستان سپر لیگ کے نویں ایڈیشن کے میچز کےلئے ٹکٹوں کی آن لائن فروخت کا آغازکل 6فروری سے ہوگا، ٹکٹوں کی قیمتیں مقرر کردی گئیں ۔پی ایس ایل میچز کی ٹکٹوں کی قیمتوں کا اعلان لیگ کے آفیشل ایکس اکاؤنٹ کے ذریعے کیا گیا ہے، پی ایس ایل 9کے افتتاحی میچ کی کم سے کم ٹکٹ 1ہزار روپے مقرر کی گئی ہے۔شائقین 6فروری کو شام 5بجے کے بعد سے پاکستان کرکٹ بورڈ کی آفیشل ویب سائٹ (pcb.tcs.com.pk)پر اپنے ٹکٹوں کی پہلے سے بکنگ کر سکتے ہیں۔افتتاحی میچ کی فرسٹ کلاس ٹکٹ 2ہزار، پریمیم ٹکٹ 3ہزار جبکہ وی آئی پی ٹکٹ 6ہزار روپے رکھی گئی ہے۔ سپر لیگ کے فائنل کی کم سے کم ٹکٹ بھی ایک ہزار روپے ہوگی۔پی ایس ایل فائنل کی فرسٹ کلاس ٹکٹ کی قیمت 2ہزار 500روپے، پریمیم 4ہزار روپے اور وی آئی پی ٹکٹ 8ہزار روپے میں فروخت ہوگی۔پی سی بی کے مطابق پی ایس ایل میچز کی ٹکٹس مخصوص ٹی سی ایس سینٹرز سے حاصل کی جاسکیں گی۔پی ایس ایل کے تمام میچوں میں سٹیڈیم میں داخلے کیلئے فزیکل ٹکٹس کی ضرورت ہوگی۔ ای ٹکٹس، جیسے ڈیجیٹل کاپیاں یا خود پرنٹ شدہ ٹکٹس پر انٹری نہیں ہوگی۔شائقین 12فروری کومخصوص ٹی سی ایس سینٹرز سے فزیکل ٹکٹ خرید سکتے ہیں۔پی سی بی کی جانب سے جاری کردہ اعلامیہ کے مطابق پی ایس ایل کے نویں ایڈیشن کا باقاعدہ آغاز 17فروری 2024سے لاہور میں ہوگا جہاں لیگ کی 2بار کی چیمپئن لاہور قلندرز کو اسلام آباد یونائیٹڈ کا چیلنج درپیش ہوگا جبکہ ایونٹ کا فائنل 18مارچ کو کراچی میں کھیلا جائےگا۔لاہور قلندرز اور کراچی کنگز کے درمیان انتہائی متوقع مقابلہ 24فروری اور 9مارچ کو کھیلا جائےگا جبکہ دونوں ٹیمیں کراچی میں 9 مارچ کو مدمقابل آئیں گی۔نیشنل سٹیڈیم کراچی فائنل اور پلے آف میچز سمیت 11میچز کی میزبانی کرےگا جبکہ لاہور کا قذافی سٹیڈیم اور پنڈی کرکٹ سٹیڈیم 9،9 میچز جبکہ ملتان 5 میچز کی میزبانی کرےگا۔