لاہور (نامہ نگار) شہر میں ٹریفک حادثات کے دو مختلف واقعات میں باپ دو کمسن بچوں سمیت جبکہ جواں سالہ لڑکی بھی ہلاک ہو گئی ہے۔ تفصیلات کے مطابق ہیئر کے علاقے بیدیاں روڈ پر ٹریکٹر ٹرالی نے رکشہ کو اوورٹیک کرتے ہوئے موٹر سائیکل کو ٹکر مار دی۔ موٹرسائیکل پر سوار دو بھائی 6 سالہ فراز اور 5 سالہ زین ٹرالی کے ٹائروں تلے آکر ہلاک جبکہ ان کا والد خضر حیات شدید زخمی ہوگیا۔ خضر حیات کو ہسپتال پہنچایا گیا مگر وہ جانبر نہ ہو سکا۔ دونوں طالبعلم بھائی فراز اور زین اپنے والد خضر کے ساتھ سکول جارہے تھے۔ پولیس نے تینوں نعشیں قبضے میں لیکر پوسٹ مارٹم کے لئے مردہ خانے منتقل کر دیں۔ ٹریکٹر ٹرالی کے ڈرائیور کو گرفتار کر لیا ہے۔ علاوہ ازیں شفیق آباد کے علاقے بند روڈ پر سڑک عبور کرتے ہوئے ساندہ ٹی نمبر 5 کی رہائشی 18سالہ عائشہ کو تیز رفتار ٹرک نے ٹکرمار دی۔ جس سے عائشہ موقع پر ہی دم تور گئی جبکہ ٹرک ڈرائیور فرار ہو گیا۔ پولیس نے موقع پر پہنچ کر نعشیں مردہ خانے منتقل کر کے قانونی کارروائی کا آغاز کر دیا ہے۔