عرفان پٹھان نے انٹرنیشنل کرکٹ سے ریٹائرمنٹ لے لی

لاہور(سپورٹس ڈیسک )بھارتی فاسٹ بائولر عرفان پٹھان نے انٹرنیشنل کرکٹ سے ریٹائرمنٹ لے لی۔انہوں نے کہا کہ ہر طرز کی انٹرنیشنل کرکٹ کو خیرباد کہہ رہا ہوں۔2003 میں انٹرنیشنل کرکٹ میں قدم رکھنے والے لیفٹ آرم فاسٹ بائولر کا انٹرنیشنل کیریئر 16 برس پر محیط رہا البتہ وہ 2012 کے بعد سے انٹرنیشنل کرکٹ سے دور تھے۔انہوں نے کہا کہ ہر طرز کی کرکٹ سے ریٹائرمنٹ کا اعلان کررہا ہوں۔انہوں نے بے پناہ سپورٹ پر اپنے اہل خانہ اور مداحوں کا بھی شکریہ ادا کیا۔عرفان پٹھان نے ٹیسٹ کرکٹ میں ہیٹ ٹرک کرنے والے دوسرے بھارتی کرکٹ 2006 میں بنے جب انہوں نے کراچی ٹیسٹ میں پاکستان کیخلاف ہیٹ ٹرک کی۔ انہوں نے سلمان بٹ، یونس خان اور محمد یوسف کو یکے بعد دیگرے پویلین کی راہ دکھائی۔ورلڈ ٹی ٹونٹی 2007 کے فائنل میچ میں بھی عرفان پٹھان مین آف دی میچ قرار پائے تھے۔اس کے علاوہ عرفان پٹھان کی واحد سنچری پاکستان کے خلاف تھی جو انہوں نے 2007 میں بنگلور میں بنائی تھی۔عرفان پٹھان نے اپنے پیغام میں کہا ہے کہ وہ کرکٹ کیلئے کسی نہ کسی طرح اپنی خدمات جاری رکھیں گے۔