لاہور(خصوصی نامہ نگار )تحریک لبیک یارسول اللہ ؐاور تحریک صراط مستقیم کے زیر اہتمام مرکز صراط مستقیم تاج باغ لاہور میں شہید ناموس رسالت ؐ حضرت غازی ممتاز حسین قادری شہید ؒ کو خراج تحسین پیش کرنے کے لیے ’’یوم عشق رسول ؐ  ‘‘ کے موقع پر ’’لبیک یارسول اللہ ؐ کانفرنس‘‘ ہوئی۔ کانفرنس کی صدارت پیر سید فضل قدیر شاہ نے کی۔ کانفرنس کا اعلامیہ پیش کرتے ہوئے تحریک لبیک یارسول ؐ کے سربراہ ڈاکٹر محمد اشرف آصف جلالی نے کہاکہ مغرب کے شان رسالت ؐپر حملوں کے ردّ عمل میں امت مسلمہ میں حضرت غازی ممتاز حسین قادری شہید جیسے کردار سامنے آتے رہیں گے۔ غازی ممتاز حسین قادری کے جذبہ عشق رسول ؐ سے ابھرنے والی بیداری نے نوجوانوں کو مادہ پرستی سے نکال کر شاہراہ مدینہ منورہ پر گامزن کر دیا ہے۔ انہوں نے کہاکہ ناجائز یہودی سٹیٹ اسرائیل کو تسلیم کرنا قرآن و سنت کے احکام کی واضح خلاف ورزی ہے۔ قرآن مجید نے یہود و نصاریٰ سے دوستی کو ایک بیماری سے تعبیر کیا ہے۔ کانفرنس میں پیر محمد امین اللہ نبیل سیالوی، مفتی محمد مختار علی رضوی، علامہ محمد عباس نقشبندی، مفتی محمد ارشاد احمد جلالی، علامہ غلام یٰسین جلالی، چودھری محمد نصر اللہ وڑائچ،حافظ محمد زوہیب جلالی، صوفی محمد اورنگزیب معصومی و دیگر نے شرکت کی۔