لاہور (وقائع نگار خصوصی) مسلم لیگ (ن) کے رہنما خواجہ سعد رفیق اور خواجہ احمد حسان کے مابین تلخ کلامی ہوگئی۔ شہباز شریف نے سیٹ سے اٹھ کر دونوں کے درمیان بچ بچائو کروایا۔  پیر کو  احتساب عدالت میں شہباز شریف فیملی منی لانڈرنگ کیس کی سماعت ہوئی۔ لیگی رہنما خواجہ سعد رفیق اور خواجہ احمد حسان بھی کمرہ عدالت میں موجود تھے۔ اس دوران اچانک خواجہ سعد رفیق اور خواجہ احمد حسان کے مابین تلخ جملوں کا تبادلہ ہوگیا اور خواجہ احمد حسان نے کمرہ عدالت میں شہباز شریف کے سامنے خواجہ سعد رفیق کو شٹ اپ کہہ دیا۔ خواجہ احمد حسان نے کہا ہے کہ خواجہ سعد رفیق لاہور جلسے سے متعلق شہباز شریف کو بریفنگ دے رہے تھے۔ میرے خلاف غلط باتیں شہباز شریف کو خواجہ سعد رفیق نے بتائیں۔علاوہ ازیں خوجہ احمد حسان نے کہا ہے کہ خواجہ سعد رفیق چھوٹے بھائی کی طرح ہیں۔ ان کے ساتھ عزت و احترام کا دیرینہ رشتہ ہے۔ وہ پارٹی کا قیمتی اثاثہ ہیں۔ زندگی میں باپ بیٹے میں کبھی تلخی ہو جاتی ہے۔ میں پارٹی کی مضبوطی کیلئے خواجہ سعید رفیق سے ملکر کام کرتا رہوں گا۔ ایک دوسرے کے ساتھ بھرپور تعاون کریں گے۔