پی سی بی ایوارڈز2021،کھلاڑی شارٹ لسٹ،بابر،شاہین،رضوان مضبوط امیدوار

لاہور(سپورٹس رپورٹر)پاکستان کرکٹ بورڈ نے ایوارڈز 2021 ء کیلئے نامزدگیوں کی فہرست جاری کردی ہے۔ فاسٹ باؤلر شاہین شاہ آفریدی کو پانچ مختلف کیٹیگریز میں شارٹ لسٹ کیا گیا ہے۔21 سالہ فاسٹ باؤلر کو سال کی سب سے متاثر کن کارکردگی، ٹی ٹونٹی انٹرنیشنل کرکٹر آف دی ایئر، ون ڈے انٹرنیشنل کرکٹر آف دی ایئر، ٹیسٹ کرکٹر آف دی ایئر اور سال کے سب سے قیمتی کرکٹر کی کیٹیگریز میں نامزد کیا گیا ہے۔کیلنڈر ایئر 2021 ء میں شاہین شاہ آفریدی نے تینوں طرز کی کرکٹ میں شاندار کارکردگی کا مظاہرہ کیا۔ انہوں نے 9 ٹیسٹ میچز میں 47 وکٹیں، 6 ون ڈے انٹرنیشنل میں 8 وکٹیں اور 21 ٹی ٹونٹی میں 23 وکٹیں حاصل کیں۔آئی سی سی مینز ٹی ٹونٹی ورلڈ کپ 2021 ء میں ان کی بھارت کیخلاف 31 رنز کے عوض 3 وکٹیں سال کی سب سے متاثرکن کارکردگی کی فہرست میں شامل ہے۔ اس کیٹیگری میں ان کے علاوہ تین اور نامزدگیاں بھی ہیں۔شاہین شاہ آفریدی سمیت تمام کھلاڑیوں کی نامزدگی 10 رکنی آزاد پینل نے کی ہے، جس میں سابق بین الاقوامی کرکٹرز، براڈکاسٹرز اور میڈیا نمائندگان شامل ہیں۔پی سی بی ایوارڈز جیتنے والے فاتحین کا اعلان ایک ورچوئل ڈیجیٹل شو کے ذریعے کرے کیا جائے گا۔ یہ ڈیجیٹل شو کل شام 7 بجے پی سی بی کے آفیشل یوٹیوب اور فیس بک چینلز پر براہ راست نشر کیے جائیں گے۔ محمد رضوان بھی سال کی سب سے متاثرکن کارکردگی، ٹی ٹونٹی انٹرنیشنل کرکٹر آف دی ایئر اور سال کے سب سے قیمتی کرکٹر کی کیٹیگریز میں نامزد ہوئے ہیں۔حسن علی کو سال کی سب سے متاثرکن کارکردگی، ٹیسٹ کرکٹر آف دی ایئر اور سب سے قیمتی کرکٹر آف دی ایئر کیلئے شارٹ لسٹ کیا گیا ہے۔بابر اعظم، فواد عالم اور حارث رؤف کو بھی ایوارڈز کی دو، دو کیٹیگریز میں شارٹ لسٹ کیا گیا ہے۔پی سی بی ایوارڈز 2020 ء کے سب سے قیمتی کرکٹر کا اعزاز حاصل کرنے والے بابر اعظم ایک بار پھر اس کیٹیگری میں نامزد ہوئے ہیں، اس کے علاوہ وہ سال کے بہترین ون ڈے انٹرنیشنل کرکٹر کی فہرست میں بھی شارٹ لسٹ ہوئے ہیں۔فواد عالم سال کی سب سے متاثرکن کارکردگی اور ٹیسٹ کرکٹر آف دی ایئر کیلئے نامزد ہوئے ہیں۔حارث رؤف کو ٹی ٹونٹی اور ون ڈے انٹرنیشنل کرکٹر آف دی ایئر کی کیٹیگریز میں شارٹ لسٹ کیا گیا ہے۔ایمرجنگ کرکٹر آف دی ایئر کیلئے ارشد اقبال، اعظم خان، محمد وسیم جونیئر اور شاہنواز دھانی کو شارٹ لسٹ کیا گیا ہے۔یکم اگست 1998ء کو یا اس کے بعد پیدا ہونے والے یا اس کیلنڈر ایئر میں انٹرنیشنل ڈیبیو کرنے والے یا کرکٹ ایسوسی ایشن کے ایونٹس اور پی ایس ایل میں کم از کم 15 میچز کھیلنے والے کھلاڑی اہل ہیں۔اس کیٹیگری میں ایک مرتبہ نامزد ہونے والے کھلاڑی کو دوبارہ نامزد نہیں کیا جا سکتا لہٰذا اس کیلنڈر ایئر میں متاثر کن کارکردگی کے باوجود حیدر علی اور محمد ہریرہ کو اس کیٹیگری کیلئے نامزد نہیں کیا گیا کیونکہ وہ گزشتہ سال شارٹ لسٹ ہوچکے تھے۔محمد ہریرہ کو ڈومیسٹک کرکٹر آف دی ایئر کے ایوارڈ کیلئے آصف آفریدی، افتخار احمد، صاحبزادہ فرحان اور طیب طاہر کے ساتھ شارٹ لسٹ کیا گیا ہے جبکہ گزشتہ سال ایوارڈ جیتنے والی عالیہ ریاض، انعم امین، فاطمہ اور ندا ڈار کو ویمنز کرکٹر آف دی ایئر کیلئے نامزد کیا گیا ہے۔امپائر آف دی ایئر اور سپرٹ آف کرکٹ ایوارڈز کے ونرز کا اعلان بھی جمعرات کی شام 7 بجے ہوگا۔