لاہور(سپورٹس رپورٹر)سڈنی ٹیسٹ میں پاکستان کی جانب سے 313رنز کے تعاقب میں آسٹریلیا کی پہلی اننگز میں بیٹنگ جاری ہے  تاہم بارش کے باعث دوسرے روز کا کھیل ختم کر دیا گیا ہے،آخری ٹیسٹ میچ کے دوسرے دن ڈیوڈ وارنر 34رنز بنا کر سلمان علی آغا کا شکار بنے جبکہ عثمان خواجہ کو عامر جمال نے 47رنز پر آئوٹ کیا۔آسٹریلیا نے 2وکٹوں پر 116رنزبنائے تھے کہ کم روشنی کے باعث کھیل روک دیا گیا اور وقفہ سے پہلے چائے کا وقفہ کر دیا گیا تاہم بعد ازاں چائے کے وقفے کے دوران ہی بارش شروع ہو گئی اور پھر مسلسل بارش کے باعث امپائرز نے دوسرے روز کا کھیل ختم کرنے کا اعلان کر دیا۔دوسرے روز کا کھیل ختم ہوا تو مارنس لابوشین 23اور سٹیوسمتھ 6رنز بناکر کریزپرموجود تھے ۔سلمان علی آغا اور عامر جمال نے ایک ایک کھلاڑی کو آئوٹ کیا ۔ آسٹریلیا کو پاکستان کی برتری ختم کرنے کیلئے مزید 197 رنزدرکار جبکہ 8وکٹیںباقی ہیں ۔قبل ازیں پاکستان نے ٹاس جیت کر پہلے بیٹنگ کا فیصلہ کیا اور پوری ٹیم313رنز بناکر پویلین لوٹ گئی تھی ۔