لاہور(سپورٹس رپورٹر )پاکستان کرکٹ ٹیم کے اوپننگ بلے باز فخر زمان نے کہا ہے کہ کپتان سرفراز احمد کی تنقید کی وجہ سے کارکردگی بہتر ہو ئی ہے ۔ کپتان میچ کے دوران ہر وقت متحرک رہتے ہیں اور ہمیں بھی متحرک رکھتے ہیں ۔ ہم ان کی تنقید کے عادی ہوگئے ہیں کیونکہ وہ ہمارے کپتان ہیں ۔ وہ ہمارے لئے ہی بہتر کرتے ہیں جیسا انہوں نے گزشتہ روز کیا ۔ زمبابوے نے ہماری سوچ سے بیس سے تیس رنز زیادہ بنائے ۔ مائر نے بڑی اچھی اننگز کھیلی ۔ ہماری بیٹنگ لائن لمبی تھی اس لئے پریشان نہیں تھے اور علم تھا زمبابوے کے خلاف یہ ہدف بھی حاصل کرلیں گے ۔ سرفراز کے وکٹ پر ہوتے ہوئے میری بیٹنگ میں بھی بہتری آئی ہے ۔ سیریز سے قبل ہر گیند کو ہٹ کرتا تھا مگر سینئر کھلاڑیوں کے مشورے پر گیم پلان تبدیل کرلیا ۔ سوچا کہ اچھی کرکٹ کھیل سکتا ہوںاور کامیاب ہوسکتا ہوں ۔ کارکردگی سب کے سامنے ہے ۔ آسٹریلیا کا مقابلہ کرنے کیلئے تیار ہیں ۔ باﺅلنگ کا سامنا کرنے کیلئے حکمت عملی تیار کرلی ہے ۔