ترک فوج کی شامی فوج کے توپخانے، راکٹ لانچروں پر شدید بمباری

دمشق (این این آئی )شام میں انسانی حقوق کی صورت حال پر نظر رکھنے والے ادارے سیرین آبزر ویٹری فار ہیومن رائٹس نے اطلاع دی ہے کہ ادلب کے دیہی علاقوں میں ترک فورسز نے شامی رجیم کی وفادار فورسز کے راکٹ لانچروں اور توپ خانے پر بھاری توپ خانے سے شدید گولہ باری کی۔غیرملکی خبررساں ادارے کے مطابق آبزرویٹری نے بتایا کہ یہ بمباری قصبہ خان السبیل اور ادلب کے جنوب میں واقع الحامدیہ گائوں کے کیمپوں پر گئی۔انسانی حقوق گروپ نے مزید کہا کہ ترکی کی جانب سے یہ گولہ باری ادلب اور اس کے اطراف میں شامی فوج کی طرف سے عام شہریوں پر حملوں کے بعد جوابی کارروائی کے طور پر کی گئی ہے۔قبل ازین شامی آبزرویٹری نے بتایا تھاکہ ادلب میں شامی فوج کی توپ خانے سے گولہ باری کے نتیجے میں چھ بچوں ، ایک عورت اور ایک مرد سمیت 8 شہری مارے گئے تھے۔