کراچی ( سپورٹس ڈیسک ) انگلینڈ اینڈ ویلز کرکٹ بورڈ کے زیر اہتمام رواں برس جاری وائٹالٹی بلاسٹ ٹی 20 کرکٹ ٹورنامنٹ کی کوارٹر فائنل لائن اپ مکمل ہوگئی ہے۔ سرے ،یارکشائر ، برمنگھم،ہیمپشائر ، لنکا شائر،ایسیکس،سمر سیٹ اور ڈربی شائر کی ٹیمیں کوارٹر فائنل رائونڈ میں پہنچ چکی ہیں۔ وائٹالٹی ٹی ٹونٹی کرکٹ ٹورنامنٹ کا کوارٹر فائنل رائونڈ 6 جولائی سے شروع ہوگا۔ پہلا کوارٹر فائنل میچ 6 جولائی کو سرے اور یارکشائر کی ٹیموں کے درمیان اوول میں کھیلا جائیگا۔ دوسراکوارٹر فائنل میچ 8 جولائی کو برمنگھم اورہیمپشائر کی ٹیموں کے درمیان ایجبسٹن برمنگھم میں کھیلا جائے گا،تیسرے کوارٹر فائنل میچ میں لنکا شائر اور ایسیکس کی ٹیمیں 9 جولائی کو اولڈ ٹریفورڈ ،مانچسٹر کے مقام پر نبردآزما ہوں گی۔
وائٹالٹی بلاسٹ
جبکہ چوتھا اور آخری کوارٹر فائنل میچ سمر سیٹ اور ڈربی شائرکی ٹیموں کے درمیان کانٹی گرانڈ، ٹاونٹن میں کھیلا جائے گا۔یہ ایونٹ انگلینڈ اینڈ ویلز کرکٹ بورڈ (ای سی بی ) نے 2003 میں دنیا کی پہلی پروفیشنل ٹی -20 لیگ کے طور پر شروع کیا تھا۔ یہ انگلینڈ اینڈ ویلز میں ٹاپ لیول کا ٹی -20ایونٹ ہے جس میں 18 ٹیمیں ٹائٹل کے حصول کے لئے پنجہ آزما ہیں۔