شاداب کی اگلے ماہ شادی،سامعہ آرزو  ، اللہ کرے ! شاداب کا جواب 

کراچی (سپورٹس رپورٹر)قومی کرکٹ ٹیم کے معروف کھلاڑی شاداب خان سے متعلق ان کی چہیتی بھابی، حسن علی کی اہلیہ نے کہا کہ شاداب خان اگلے ماہ شادی کرنیوالے ہیں۔گزشتہ دنوں بائولر حسن علی کی اہلیہ سامعہ آرزو نے انسٹا گرام اسٹوری لگائی اور اپنے فالوورز کو بے شمار سوالوں کے جوابات دئیے۔سامعہ آرزو کا بتانا تھا کہ پاکستان میں ان کا سب سے پسندیدہ شہر لاہور ہے اور وہ لاہور ہی میں رہتی ہیں، انکا پسندیدہ ملک بھارت ہے۔سامعہ آرزو نے مزید سوالوں کے جوابات دیتے ہوئے کہا کہ انکی بہترین دوست بھارتی ٹینس سٹار، قومی کرکٹر شعیب ملک کی اہلیہ ثانیہ مرزا ہیں۔سامعہ آرزو نے کہا کہ حسن علی کی پسندیدہ غذا دال چاول ہے ۔اپنے پسندیدہ کھلاڑیوں کے بارے میں بتاتے ہوئے سامعہ آرزو نے لکھا کہ انہیں پاکستان میں بابر اعظم اور شاداب خان پسند ہیں جبکہ بھارتی ٹیم  میں ویرات کوہلی اْن کے پسندیدہ کھلاڑی ہیں۔شاداب خان کی شادی سے متعلق پوچھے گئے سوال کے جواب میں سامعہ نے لکھا کہ شاداب خان کی اگلے ماہ شادی ہے۔اس دلچسپ جواب پر شاداب خان اس سوال جواب کے سیشن میں کود پڑے۔شاداب خان نے انسٹا گرام پر سامعہ آرزو کے جواب پر ردِ عمل کا اظہار کرتے ہوئے لکھا ہے کہ اللہ کرے! لیکن ہو کہاں رہی ہے مجھے بھی بتا دیں۔