سابق کپتانوں ‘ٹیسٹ کرکٹرز سے رابطے ‘بورڈ میں کام کی پیشکش

لاہور(سپورٹس رپورٹر) 5 سابق کرکٹرز کو چیمپئنز لیگ میں ٹیموں کا مینٹور بنانے کا فیصلہ، 3 سابق کپتانوں کو کرکٹ بورڈ میں اہم ذمہ داریاں دی جائیں گی۔ پاکستان کرکٹ بورڈ نے متعدد سابق کپتانوں اور ٹیسٹ کرکٹرز سے رابطے کرکے انہیں بورڈ میں کام کرنے کی پیشکش کی ہے۔ذرائع کے مطابق چیئرمین پی سی بی محسن نقوی نے خود قومی ٹیم کے سابق کپتانوں سے رابطہ کیا اور ان کھلاڑیوں سے پاکستان کرکٹ کی بہتری کیلئے تجاویز طلب کی گئی ہیں، جبکہ انہیں پاکستان کرکٹ بورڈ میں لانے کا فیصلہ بھی کیا گیا ہے۔ سابق کپتان انضمام الحق، معین خان، مصباح الحق، شعیب ملک، شاہد آفریدی، یونس خان سے رابطے کیے گئے جبکہ ثقلین مشتاق، مشتاق احمد، وقار یونس، کامران اکمل کو بھی بورڈ میں کام کرنے کی پیشکش کی گئی ہے۔ ٹی20 ورلڈکپ میں پاکستان ٹیم کی خراب کارکردگی کے بعد بڑے پیمانے پر تبدیلی کا فیصلہ کیا گیا ہے۔ موجود سیٹ اپ میں صرف ہیڈ کوچز کو برقرار رکھا جائیگا جبکہ ٹیم منیجر سمیت اسسٹنٹ کوچ اور دیگر سٹاف کو فارغ کیا جاسکتا ہے۔ بابراعظم کو کپتان برقرار رکھنے کا فیصلہ ہیڈ کوچز اور سابق کرکٹرز سے مشاورت کے بعد کیا جائیگا۔