وہاب ریاض کی  نظریں پی ایس ایل وکٹوں کی سینچری پر

کراچی (نیوزرپورٹر)پاکستان سپر لیگ(پی ایس ایل)کی ٹیم پشاور زلمی کے کپتان اور فاسٹ بولر وہاب ریاض نے اپنی نظریں پی ایس ایل میں وکٹوں کی سینچری مکمل کرنے پر جما لیں۔35 سالہ وہاب ریاض پی ایس ایل کی ابتدا ہی سے پشاور زلمی کا حصہ رہے ہیں، اب تک 59 پی ایس ایل میچز میں انہوں نے سب سے زیادہ 84 وکٹیں حاصل کی ہیں، پی ایس ایل 6میں پشاور کی ٹیم کو کم از کم 6 میچز اور کھیلنا ہیں ، وہاب ریاض کہتے ہیں کہ ان میچز میں ہی وہ بقیہ وکٹیں مکمل کرلیں گے۔پی ایس ایل میں پشاور کی پیش رفت پر وہاب ریاض کا کہنا ہے کہ مارچ سے اب تک بہت کچھ تبدیل ہوا ہے، کنڈیشنز بھی پہلے سے مختلف ہیں، ٹیم میں بھی تبدیلی ہے، میچز سے قبل جو  دن ملے ہیں اس میں کوشش کریں گے کہ کنڈیشنز میں ایڈجسٹ ہوں اور جہاں سے مومینٹم رکا تھا وہیں سے اس کو دوبارہ شروع کریں۔ قومی فاسٹ بولر نے مزید کہا کہ ان کی ٹیم نے ری پلیسمنٹ ڈرافٹ میں بھی وہی پلیئرز لیے ہیں جو کامبی نیشن کے مطابق ایڈجسٹ ہوسکیں، نئے لڑکے بھی اچھے پلیئرز ہیں اور سب ہی میچ ونر ہیں ۔