پاکستان نیوزی لینڈ میں ٹی ٹونٹی، ون ڈے سیریز کھیلنے پر رضا مند

لاہور (سپورٹس رپورٹر )پاکستان کرکٹ بورڈ نے کیویز کے خلاف وائٹ بال سیریز کھیلنے کیلئے دورہ نیوزی لینڈ کی تجویز قبول کرلی۔ پاکستان اور نیوزی لینڈ کے درمیان مجوزہ سیریز پانچ ٹی20 اور تین ون ڈے میچز پر مشتمل ہوسکتی ہے۔کیوی بورڈ نے رواں سال تجویز دی تھی کہ سال 2024 ء کے ابتداء میں پاکستان ٹیم دورہ آسٹریلیا کیلئے آئیگی تو اس سیریز کے بعد جنوری کے وسط میں سیریز شیڈول کرلیا جائے۔پاکستان اور آسٹریلیا کے درمیان 7 جنوری 2024 ء کو تین ٹیسٹ میچوں کی سیریز کے اختتام کے بعد پاکستان اور نیوزی لینڈ کے درمیان سیریز کا آغاز جنوری کے دوسرے ہفتے میں متوقع ہے۔فیوچر ٹور پروگرام کے تحت یہ شیڈول نیوزی لینڈ کرکٹ کیلئے بھی خالی ہے کیونکہ فروری میں جنوبی افریقی ٹیم کو ہوم سیریز کیلئے کیویز کے دیس کا دورہ کرنا ہے۔ پاکستان کرکٹ بورڈ اور کیوی بورڈ نے سیریز کو حتمی شکل دینے کی کوشش کررہے ہیں جس میں میچز کی تعداد اور مقامات شامل ہیں۔واضح رہے کہ مئی کے ابتداء میں نیوزی لینڈ نے پاکستان کا دورہ کیا تھا جس میں انہیں ون ڈے میں 1-4 سے شکست کا منہ دیکھنا پڑا تھا۔