گوادر میںتین روزہ یوتھ فیسٹیول آج شروع ہوگا

گوادر (بیورو رپورٹ) تین روزہ یوتھ فیسٹیول کا آغاز آج ہوگا۔ میگا ایونٹ کا افتتاح وزیر اعلیٰ بلوچستان میر عبدالقدوس بزنجو کریں گے۔ گوادر سمیت صوبے بھر میں نوجوان مختلف ایونٹس میں اپنے جوہر دکھائیں گے۔ان خیالات کا اظہار ڈپٹی کمشنر گوادر ریٹائرڈ جمیل احمد رند نے گوادر پریس کلب کے پروگرام میں  گفتگو کرتے ہوئے کیا۔  انہوں نے کہا کہ گوادر میں پہلی مرتبہ صوبائی حکومت کی جانب سے یوتھ فیسٹیول کا 3 روزہ شاندار میگا ایونٹس کا انعقاد آج وزیر اعلیٰ بلوچستان میر عبدالقدوس بزنجو بابا بزنجو فٹبال اسٹیڈیم میں کریں گے۔ انہوں  نے کہا کہ اس اہم میگا ایونٹس میں گوادر سمیت صوبے بھر سے نوجوان اپنے فن اور کارکردگی کا مظاہرہ کریں گے ، 3 روزہ شاندار میگا ایونٹس میں مختلف سٹالز بھی لگائے جائیں گے ، سائنسی آلات ، روایتی کھانوں ، لباس ، گیمز کی نمائش کے ساتھ ،ٹیبلوز، خاکے ڈرامے ، تقاریر کے مقابلوں کے علاوہ مختلف علاقائی زبانوں میں گلوکار گائیکی کا مظاہرہ کریں گے اور لوگوں سے داد تحسین حاصل کریں گے۔ قبل ازیں گوادر پریس کلب  آمد پر  قائم مقام صدر صداقت بلوچ اور دیگر صحافیوں نے ان کا پرجوش استقبال کیا۔  سٹیج سیکرٹری کے فرائض سرپرست اعلیٰ ایم بی سالک نے سرانجام دئیے۔