لاہور؍گوجرانوالہ؍ حافظ آباد (نیٹ نیوز+ نمائندہ خصوصی) صوبائی دارالحکومت سمیت مختلف شہروں میں تیز ہواؤں کے ساتھ بارش سے موسم خوشگوار ہو گیا۔ کینال روڈ، مسلم ٹاؤن، گڑھی شاہو اور ارد گرد کے علاقوں میں ہلکی بارش ہوئی۔ گوجرانوالہ میں بارش اور ژالہ باری سے موسم خوشگوار ہو گیا۔ حافظ آباد اور گردونواح میں ژالہ باری سے چارہ، سبزیوں کی فصل کو شدید نقصان ہوا۔ نشیبی علاقے زیر آب آ  گئے۔ لالیاں، بہاولپور، احمد پور شرقیہ اور اوچشریف میں بھی آندھی اور گرج چمک کے ساتھ موسلا دھار بارش سے مختلف علاقوں میں بجلی معطل ہوگئی۔ جس سے متعدد علاقے تاریکی میں ڈوب گئے۔ جھنگ، شاہ کوٹ، ننکانہ صاحب، فیصل آباد، چنیوٹ، سانگلہ ہل، چناب نگر، صفدر آباد، عمر کلور کوٹ سمیت گرد و نواح کے علاقوں میں طوفانی بارش کے باعث متعدد فیڈر ٹرپ کر گئے۔ بارش سے گندم کی کھڑی فصلوں کو شدید نقصان پہنچا۔ مینگورہ شہر اور گردونواح میں موسلا دھار بارش سے نکاسی آب کا نظام درہم برہم ہو گیا۔