کرشنا(این این آئی)بھارت میں پیش آئے ایک افسوسناک واقعے میں ڈاکٹر نے اپنے پورے خاندان ماں، بیوی اور دوبچوں کو قتل کرکے اپنی زندگی کا خاتمہ کرلیا۔غیر ملکی ذرائع ابلاغ کے مطابق بھارتی ریاست یوپی کے ضلع کرشنا کے سب سے بڑے شہر وجئے واڑہ میں 40 سالہ آرتھوپیڈک ڈاکٹر نے منگل کی صبح پیٹاماتا پولیس اسٹیشن کی حدود میں اپنی رہائش گاہ پر اپنی زندگی کا خاتمہ کرنے سے پہلے اپنی ماں، بیوی اور دو بچوں کو مبینہ طور پر قتل کردیا۔ پولیس کو شبہ ہے کہ آرتھوپیڈک سرجن کے انتہائی قدم کی وجہ مالی پریشانی ہوسکتی ہے۔مرنے والوں کی شناخت دراوت سری نواس (40)، اس کی بیوی اوشا رانی (36)، دو بچے سیلجا (9)، سریہان (6) اور اس کی ماں رامانما (65) کے طور پر کی گئی ہے۔اس واقعے کا انکشاف اس وقت ہوا جب گھریلو ملازمہ رہائش گاہ پر پہنچی اور سرینواس کی لاش کوریڈور کے پاس لٹکی ہوئی نظر آئی۔ اس نے فورا پڑوسیوں کو آگاہ کیا اور پولیس کو اطلاع دی گئی۔پولیس حکام موقع پر پہنچ گئے اور واقعہ کے بارے میں دریافت کیا۔ سراغ لگانے والی ٹیم، سنیفر ڈاگ اور فنگر پرنٹس کے ماہرین نے گھر سے شواہد اکٹھے کئے جبکہ پولیس کو سرینواس کی لاش گھر کے دروازے پر ملی جب کہ خاندان کے باقی افراد کی لاشیں گھر کے اندر موجود تھیں۔میڈیا کے نمائندوں سے بات کرتے ہوئے ڈپٹی کمشنر آف پولیس نے کہا کہ خاندان کے سربراہ ڈاکٹر سرینواس ایک پرائیویٹ اسپتال میں کام کرتے تھے اور بعد میں انہوں نے اپنا ایک اسپتال شروع کیا۔انہوں نے مختلف اداروں سے قرضہ لیا۔ ہسپتال کے خسارے میں جانے اور بھاری قرضوں کے بوجھ کے بعد افسردہ سرینواس نے بوجھ کم کرنے کے لیے ہسپتال کو دوسرے شخص کے حوالے کر دیا۔مالی مسائل کو برداشت کرنے سے قاصر، سری نواس نے انتہائی قدم اٹھایا۔