سیرت مصطفی پر عمل کرکے ہی کامیابی حاصل کی جاسکتی ہے : احمد شاہ بخاری

گوجرانوالہ(نمائندہ خصوصی)سیرت مصطفی پر عمل کرکے ہی کامیابی حاصل کی جاسکتی ہے ،نظام مصطفی کے نفاذ کے لیے تمام مکتب فکر کے علمائے کرام کو اپنا کردار ادا کرنا ہوگا اور اسی نظام میں ہماری فلاح اور کامیابی ہے، ہمیں عہد کرنا چاہئے کہ ہم خاتم الانبیا ؐ کی سیرت پر عمل کریں گے۔ آج پوری دنیا میں مسلمان ظلم وستم مسائل کا شکار ہیں جس کی سب سے بڑی وجہ حضور اکرمؐکی تعلیمات سے دوری ہے جب تک مسلمان اپنے دین پر عمل نہیں کریں گے تب تک کامیابی ممکن نہیں۔ان خیالات کا اظہار مولانا علامہ صاحبزادہ سید احمد شاہ بخاری،علامہ ڈاکٹر محمد ابوبکر صدیق الازھری نے جامعہ نعمانیہ رضویہ فیض العلوم کے زیر اہتمام جامع مسجد نعمان نعمانیہ روڈ میں محفل میلاد و مفتی محمد عبداللہ قادری مردانوی ؒ  کے 34واں سالانہ عرس کے موقع پر خطاب کرتے ہوئے کیا ۔ تقریب کی صدارت صدر مرکزی انجمن تاجران امن کمیٹی میاں محمد اکرم نے کی۔