بھارت سے عبرتناک شکست‘سری لنکن سلیکٹرز و کوچنگ سٹاف سے وضاحت طلب

لاہور(سپورٹس رپورٹر)بھارت کے ہاتھوں ورلڈکپ کے میچ میں عبرتناک شکست کے بعد سری لنکن کرکٹ نے کوچنگ سٹاف اور سلیکٹرز سے وضاحت طلب کرلی۔ واضح رہے کہ ممبئی کے وانکھڈے سٹیڈیم میں کھیلے گئے میچ میں 358 رنز کے تعاقب میں سری لنکن ٹیم 55 رنز پر ڈھیر ہوگئی تھی۔ سری لنکن کرکٹ کا کہنا ہے کہ ٹیم کی حالیہ کچھ میچز میں ناکامی اور خراب پرفارمنس نے تیاری سے متعلق سوالات کو جنم دےدیا ہے۔ وہ شفافیت اور معاملے سے متعلق خدشات کو فوری طور پر حل کرنے کی اہمیت پر یقین رکھتے ہیں۔ سری لنکا کرکٹ نے قومی ٹیم کی ورلڈکپ 2023 ءمیں پرفارمنس پر انتہائی دکھ کا اظہار کیا ہے بالخصوص بھارت کےخلاف میچ میں پرفارمنس پر۔ انہیں خدشات کی روشنی میں سری لنکا کرکٹ نے سلیکٹرز اور کوچنگ سٹاف سے فوری اور جامع وضاحت طلب کی ہے۔