ورلڈ سنوکر چیمپئن شپ‘ 3پاکستانی ناک آئوٹ مرحلے میں پہنچ گئے

لاہور(سپورٹس رپورٹر)انٹرنیشنل بلیئرڈ سنوکر فیڈریشن کے ورلڈ سنوکر چیمپئن شپ مقابلوں میں پاکستان کے تین کھلاڑی ناک آئوٹ رائونڈ میں پہنچ گئے۔ورلڈ سنوکر چیمپئن شپ مقابلوں میں پاکستان کے اسجد اقبال براہ راست رائونڈ آف 16میں پہنچے جبکہ محمد آصف اور اویس منیر رائونڈ آف 24 کھیلیں گے۔محمد آصف جرمنی کے سائمن لچنبرگ سے ہار کر بھی اگلے رائونڈ تک آگئے اور محمد آصف فریم ڈفرینس کی بنیاد پر اپنے گروپ میں دوسرے نمبر پر رہے۔آخری میچ میں سائمن لچنبرگ نے آصف کو 3-4 سے شکست دی تھی، اسجد اقبال نے آخری گروپ میچ میں قطر کے خامس العبیدی کو 0-4سے شکست دی۔اسجد اقبال نے اپنے تینوں میچ جیت کر گروپ میں پہلی پوزیشن حاصل کی جبکہ اویس منیر نے بحرین کے حبیب صباح کو 1-4 سے شکست دے کر ناک آئوٹ رائونڈ میں جگہ بنائی۔پاکستان کے چوتھے کھلاڑی نسیم اختر دو میچز ہارنے کے بعد ناک آئوٹ رائونڈ تک رسائی حاصل کرنے میں ناکام رہے ۔