پنجاب اسمبلی پریس گیلری کمیٹی انتخابات: خواجہ نصیر، عدنان شیخ بلا مقابلہ صدر وسیکرٹری منتخب  

لاہور (خصوصی نامہ نگار ) پنجاب اسمبلی پریس گیلری کمیٹی انتخابات، خواجہ نصیر اور عدنان شیخ بلا مقابلہ صدر وسیکرٹری منتخب ہوگئے۔وزیراعلیٰ پنجاب مریم نواز شریف، سپیکر پنجاب اسمبلی ملک محمد احمد خان، عطاتارڑ نے پنجاب اسمبلی کی پریس گیلری کمیٹی کے نو منتخب صدر سینئر صحافی خواجہ نصیر اور سیکرٹری عدنان شیخ کومبارکباد دی ہے۔ الیکشن کمشنر کے فرائض سینئر صحافی حامد ریا ض ڈوگر اور ارسلان رفیق بھٹی نے سرانجام دیئے۔ اس سال کے انتخابات میں صدر اور سیکرٹری کے عہدوں کیلئے صرف خواجہ نصیر اور عدنان شیخ نے کاغذات نامزدگی جمع کروائے گئے اس کے علاوہ کسی دوسرے ممبر نے پریس گیلری کے انتخابات میں کاغذات نامزدگی جمع نہیں کروائے۔ سپیکر پنجاب اسمبلی ملک محمد احمد خان نے توقع ظاہر کی کہ پریس گیلری کمیٹی کے نو منتخب عہدیداران پنجاب اسمبلی اور صحافی برادری کے درمیان موثر رابطے کیلئے اپنا بھرپور کردار ادا کرینگے اور پنجاب اسمبلی کی کارروائی و قانون سازی کو میڈیا کے ذریعے عوام تک پہنچانے کیلئے اپنی تمام تر صلاحیتیں بروئے کار لائیں گے۔ سپیکر ملک محمد احمد خان نے کہا ہمیں اپنے ان تمام صحافی بھائیوں اور بہنوں پر فخر ہے جنہوں نے استحکام پاکستان کیلئے اپنا کردار بخوبی ادا کیا اور اپنے قلم کے ذریعے جہاد جاری رکھے ہوئے ہیں۔