وزیراعظم ملائیشیا سے جماعت اسلامی کے وفد کی ملاقات، اسرائیل کیخلاف احتجاج پر اتفاق 

لاہور+ اسلام آباد (خصوصی نامہ نگار+ خبر نگار) ملائیشیا کے وزیراعظم انور ابراہیم کی دعوت پر حافظ نعیم الرحمن کی قیادت میں جماعت اسلامی کے وفد نے اسلام آباد میں ان سے  ملاقات کی۔ وفد میں جماعت اسلامی کے سیکرٹری جنرل امیر العظیم اور ڈائریکٹر امور خارجہ آصف لقمان قاضی بھی شامل تھے۔ پنتالیس منٹ تک جاری رہنے والی ملاقات میں اس امر پر اتفاق پایا گیا کہ غزہ اور لبنان میں اسرائیلی جارحیت  کو روکنے کے لیے اسلامی ملکوں کی قیادت کو فوری کردار ادا کرنا چاہئے۔ اتفاق کیا گیا کہ مزاحمت کے ایک سال مکمل ہونے پر سات اکتوبر کو عالمی سطح پر اسرائیلی جارحیت کے خلاف احتجاج کیا جائے۔ حافظ نعیم الرحمن نے ملائشین حکومت کی طرف سے فلسطینی زخمیوں کی دیکھ بھال کی کوششوں پر انور ابراہیم کو خراج تحسین پیش کیا۔ وزیراعظم انور ابراہیم نے حافظ نعیم الرحمن کو ملائیشیا آنے کی دعوت دی۔ امیر جماعت اسلامی نے ان کا شکریہ ادا کیا اور ملائیشیا میں مقیم پاکستانیوں کو درپیش مسائل کے حوالے سے خصوصی اقدامات کی درخواست کی۔ انور ابراہیم نے زمانہ طالب علمی میں پاکستان کے اپنے دوروں میں اسلامی جمعیت طلبہ اور سید ابو الاعلی مودودی کے ساتھ اپنی ملاقاتوں کے خوشگوار یادوں کو تازہ کیا۔ ملاقات دوستانہ اور غیر رسمی ماحول میں ہوئی۔