پی ٹی آئی دہشت گرد جماعت ‘اس کا سیاست سے کوئی تعلق نہیں: عظمٰی بخاری 

لاہور ( نیوز رپورٹر) وزیر اطلاعات پنجاب عظمٰی بخاری نے کہا ہے کہ پی ٹی آئی دہشت گرد جماعت ہے‘اس کا سیاست سے کوئی تعلق نہیں۔ یہ فتنہ گروہ ملکی ترقی کے خلاف ہے، عوام انہیں جان چکے ہیں۔ اڈیالہ کا قیدی مار دھاڑ، جلاؤ گھراؤ اور لاشیں گرانا چاہتا ہے۔ فتنہ خان کو پاکستان کی ترقی اور خوشحالی کسی صورت پسند نہیں۔ ملک جب بھی ترقی کی جانب گامزن ہوتا ہے تانگہ پارٹی روڑے اٹکانے آجاتی ہے۔ انہوں نے کہا کہ علی امین گنڈا پور کرینوں، لفٹرز، سرکاری وسائل اور سرکاری ملازمین کے ساتھ اسلام آباد پر چڑھائی کرنے آئے۔ مجھے بتائیں کیا اس قسم کی مشینری کے ساتھ سیاسی جدوجہد ہوتی ہے؟گنڈا پور سیاسی شو نہیں فساد پھیلانے آئے۔ پنجاب مکمل طور پر پرامن رہا اور یہاں کے لوگوں نے فسادی ٹولے کو یکسر مسترد کر دیا۔علی امین جو مشینری اسلام آباد پرچڑھائی کیلئے لا ئے وہ کے پی کے کے لوگوں کیلئے استعمال کیوں نہیں ہوتی؟ پنجاب میں جو بھی قانون توڑے گا اس کے ساتھ سختی سے نمٹا جائے گا۔ شہریوں کے جان و مال کا تحفظ حکومت کی ذمہ داری ہے۔ انکا کہنا تھا کہ پاکستان میں شنگھائی تعاون تنظیم کا اجلاس ہونے جا رہا ہے اور یہ لوگ اسے سبوتاژ کرنے کے در پہ ہیں۔ پاکستان انٹرنیشنل کمیونٹی سے تعلقات دوبارہ بحال کر رہا ہے۔پاکستان کو عالمی تنہائی کا شکار کرنے والے دوبارہ یہی حربے استعمال کررہے ہیں۔