لاہور اور گردونواح میں دوسرے روز بھی موسلا دھار بارش کے بعد حبس اور گرمی کا زورٹوٹ گیا جبکہ فضا میں نمی سے موسم خوشگوارہوگیا ہے۔ لاہور میں گزشتہ روز اٹھارہ ملی میٹر بارش ریکارڈ کی گئی تھی۔  کراچی اور ٹھٹھہ سمیت سندھ کے مختلف علاقوں میں ابررحمت برسنے سے لوگوں کے چہرے کھل اٹھے۔ گلگت بلتستان کے شہرچیلاس اور گردونواح کے پہاڑی علاقوں میں بھی بارش سے موسم خوشگوارہوگیا جبکہ چترال اور سوات میں بھی بادل کھل کربرسے۔ محکمہ موسمیات کے مطابق مون سون بارشوں کا یہ سلسلہ آئندہ چند روزتک جاری رہے گا۔