کراچی (آئی این پی،کلچرل رپورٹر) ریڈیو، ٹی وی اور فلم کے معروف اداکار مقصود حسن بدھ اور جمعرات کی درمیانی شب حرکت قلب بند ہو جانے سے انتقال کر گئے اْن کی عمر67 سال تھی۔ انہیں جمعرات کو بعد نماز ظہر عیسیٰ نگری قبرستان میں سپردخاک کر دیا گیا۔ قبل ازیں ان کی نماز جنازہ غزالہ مسجد نزد حسن سکوائر پر ادا کی گئی جس میں فنکاروں کی کثیر تعداد اور عزیزو اقارب نے شرکت کی۔ چھوٹے قد کے بڑے فنکار مقصود حسن کا شمار اداکاری اور صداکاری کے شعبہ میں سینئر اداکاروں میں ہوتا تھا۔ انہوں نے ریڈیو پاکستان کراچی کے بچوں کے پروگرام سے شہرت حاصل کی اور ریڈیو پاکستان کے مقبول پروگرام سٹوڈیو نمبر 9 کے کئی ڈراموں میں صداکاری کی۔ مقصود حسن نے عمر شریف کے کئی ڈراموں میں فن کا مظاہرہ کیا ، انہیںڈرامہ’’ بکرا قسطوں پر‘‘سے شہرت ملی۔ انہوں نے ٹی وی پر 100 سے زائد ڈراموں میں کام کیا۔