انگلینڈ: فٹبال میچ کے دوران کھلاڑی کو ہارٹ اٹیک، تشویشناک حالت میں ہسپتال منتقل

لندن(آئی این پی) برطانیہ میں جاری فٹبال میچ کے دوران ایک کھلاڑی کو دل کا دورہ پڑا، جسے تشویشناک حالت میں ہسپتال منتقل کیا گیا۔ برطانوی میڈیا رپورٹ کے مطابق برطانیہ میں جاری فٹبال ایسوسی ایشن یوتھ چیلنج کپ (ایف اے یوتھ کپ) میں ایک میچ کے دوران کھلاڑی میچ کے دوران زمین پر لیٹ گیا۔ رپورٹ کے مطابق یہ میچ ویسٹ برج فورڈ ایف سی کولٹس اور بوسٹن یونائیٹڈ کے درمیان کھیلا جارہا ہے، کہ اسی دوران ویسٹ برج فورڈ کا ایک کھلاڑی اچانک زمین پر گر کر تڑپنے لگا۔کھلاڑی کو فوری طور پر کوئنز میڈیکل سینٹر منتقل کیا گیا، جہاں ڈاکٹرز نے بروقت طبی امداد فراہم کی، جو خوش قسمتی سے جان بچانے میں معاون ثابت ہوئی۔ ویسٹ برج کلب کی طرف سے جاری ایک بیان میں کہا گیا ہے کہ ’ہم تصدیق کرتے ہیں کہ آج کے میچ میں ہمارے ایک کھلاڑی کو طبی مسئلہ درپیش آیا تھا، ہم نے فوری طور پر ایمرجنسی سروسز کو کال کی اور کھلاڑی کو بروقت ہسپتال پہنچا دیا گیا، ہم لوگوں سے درخواست کرتے ہیں کہ وہ ہمارے کھلاڑی کی پرائیویسی کا خیال رکھیں‘۔