سابق کپتان وسیم اکرم  کی10 ماہ بعد شنیرا اور بیٹی سے ملاقات

لاہور(سپورٹس رپورٹر)قومی کرکٹ کے سابق لیجنڈری کرکٹر وسیم اکرم 10 ماہ کے طویل عرصے کے بعد اپنی اہلیہ شنیرا اور بیٹی عائلہ سے مل گئے۔ ٹوئٹر پر وسیم اکرم نے ویڈیو شیئر کی ہے جس میں دیکھا جاسکتا ہے کہ عائلہ بھاگتے ہوئے گھر کا دروازہ کھولتی ہیں تو سامنے اْن کے والد وسیم اکرم کھڑے ہوتے ہیں۔عائلہ اپنے والد کو دیکھ کر فوراََ اْن کے گلے لگ جاتی ہیں اور وسیم اکرم کہتے ہیں کہ میں نے آپ کو بہت زیادہ یاد کیا۔وسیم اکرم نے باپ بیٹی کے رشتے کو بیان کرتی یہ جذباتی ویڈیو شیئر کرتے ہوئے لکھا کہ ’آخرکار! میں نے 10 ماہ کے بعد اپنی بیٹی کو دیکھ لیا۔اْنہوں نے اتنے ماہ بیٹی عائلہ کو اکیلے سنبھالنے پر شنیرا کا شکریہ بھی ادا کیا۔سابق کرکٹر نے اپنے ٹوئٹ میں ہیش ٹیگ HappyDays  بھی لکھا جس سے اندازہ لگایا جاسکتا ہے کہ اس فیملی کے اچھے دنوں کا آغاز ہوگیا ہے۔