اسلام آباد: سابق وزیر اعظم عمران خان کی تقریر پر پابندی کے کیس میں ہائیکورٹ نے سخت ریمارکس دئیے. پی ٹی آئی رہنما فواد چوہدری کا کہنا ہے کہ جج صاحبان کا ہر موضوع پر تبصرہ کرنا نامناسب ہے۔
سماجی رابطے کی ویب سائٹ ٹوئٹر پر اپنے پیغام میں سابق وفاقی وزیر فواد چوہدری نے کہا کہ جہاں تک مجھے یاد پڑتا ہے کہ عمران خان نے غیر محبِ وطن کا ذکر ہی نہیں کیا تھا۔ ہر جرنیل اور پاکستانی شہری محبِ وطن ہے۔ٹوئٹر پیغام میں سابق وزیرِ اطلاعات فواد چوہدری نے کہا کہ عمران خان نے میرٹ پر تقرری کی بات کی تھی۔ ویسے بھی یہ سیاسی معاملہ ہے، عدالتی نہیں۔ جج صاحبان کا ہر موضوع پر کمنٹس دینا نامناسب ہے۔
عمران خان نے کہا نواز شریف اور زرداری سیکیورٹی رسک ہیں کیونکہ ان کی جائیدادیں اور اولادیں ملک سے باہر ہیں اور تمام تر Interests ملک سے باہر ہیں ان کا بیان فوج یا فوج کی قیادت کے خلاف ہر گز نہیں ہے https://t.co/beSba5dtRb
— Ch Fawad Hussain (@fawadchaudhry) September 5, 2022
سابق وزیرِ اطلاعات فواد چوہدری نے عمران خان کی تقریر پر پابندی سے متعلق کیس کی سماعت کے دوران اسلام آباد ہائیکورٹ کے ریمارکس کا حوالہ بھی دیا جس میں عدالت کا کہنا تھا کہ کیا یہ کہنا مناسب ہے کہ فوج کے کچھ جرنیل محبِ وطن ہیں اور کچھ نہیں؟
واضح رہے کہ پاکستان الیکٹرانک میڈیا ریگولیٹری اتھارٹی (پیمرا) نے عمران خان کی تقریر براہِ راست نشر کرنے پر پابندی عائد کی تھی جس کے خلاف پی ٹی آئی کی درخواست اسلام آباد ہائیکورٹ میں زیرِ سماعت ہے۔چیف جسٹس اسلام آباد ہائیکورٹ جسٹس اطہر من اللہ عمران خان کی تقریر پر پابندی سے متعلق درخواست کی سماعت کر رہے ہیں۔ معزز عدالت نے درخواست کی سماعت کے دوران ریمارکس دئیے کہ بڑے ذمہ دار لوگ غیر ذمہ دارانہ بیانات دیتے ہیں۔
