راولپنڈی (نوائے وقت رپورٹ + صباح نیوز) پاک فوج کے شعبہ تعلقات عامہ (آئی ایس پی آر)کے ڈائریکٹر جنرل میجر جنرل آصف غفور نے کہا ہے کہ سچائی کا ہمیشہ بول بالا ہوتا ہے۔ وقت آ گیا ہے کہ بھارت اب سچ بولے۔ اپنے ٹویٹر بیان میں انہوں نے کہا کہ تمام تعریفیں اللہ تعالیٰ کے لئے ہیں، جیت ہمیشہ سچ کی ہوتی ہے، وقت آ گیا ہے کہ بھارت اپنے جھوٹے دعووں سے متعلق سچ بولے، اب بھارت اپنی طرف پاکستان کی جانب سے دوسرا طیارہ گرانے کے واقعہ میں ہونے والے نقصان کے حوالہ سے بھی بتائے۔ انہوں نے کہا کہ بھارت اپنے جانی نقصان کے بارے میں سچ بتائے۔ انہوں نے کہا کہ بھارت کو چاہئے کہ وہ خاص طور پر مقبوضہ کشمیر میں جاری مظالم پر اپنا احتساب کرے۔ انہوں نے کہا کہ خطے کو امن، ترقی اور خوشحالی کی ضرورت ہے۔ بھارت کو اپنے گریبان میں جھانکنے کی ضرورت ہے۔ خصوصاً کشمیر کے معاملے پر ترجمان پاک فوج میجر جنرل آصف غور نے سماجی رابطوں کی ویب سائٹ ٹویٹر پر جاری اپنے بیان میں کہا ہے کہ گرائے گئے بھارتی طیارے مگ 21 کے ملبے سے چاروں میزائل درست حالت میں قبضے میں لئے گئے۔ پاکستان نے شور نہ مچا کر عاجازی کا ثبوت دیا۔ ہمارے پاس بتانے کیلئے مزید سچ موجو ہیں۔