عائشہ عمر اور احسن خان کی فلم’’رہبرا‘‘کا ملک بھر میں  ٹیزرلانچ ہوگیا

کراچی (کلچرل ڈیسک)رومان‘ مزاح اور ایکشن سے بھرپور فلم ’’رہبرا‘‘کی نمائش کی تاریخ کا اعلان کرتے ہوئے ملک بھر میں فلم کا زبردست ٹیزرلانچ کردیا گیا۔ ’’رہبرا‘‘ کو تحریر کیا ہے امین اقبال نے اور پروڈیوس کیا ہے سائرہ افضل نے۔ اعلان کردہ تاریخ کے مطابق یہ فلم ملک بھر کے سینماؤں میں 24جون کو نمائش کے لئے پیش کی جائے گی۔ اس فلم کے مرکزی کردار عائشہ عمر اور احسن خان ہیں جبکہ دیگر نمایاں ناموں میں غلام محی الدین‘ سہیل سمیر اور صبا فیصل کے نام شامل ہیں۔اس فلم کے پوسٹرز اور ٹیزر سوشل میڈیا پر دھوم مچا رہے ہیں۔فلم کی ہیروئن عائشہ عمر نے حال ہی میں سوشل میڈیا پر اپنا ایک پوسٹر شیئر کیاہے۔انہوں نے اپنی پوسٹ میں فلم اور احسن خان کو اپنا ’’رہبرا‘‘کرتے ہوئے کہا’’یہ ہمارا ایک ایسا بچہ ہے جسے ہم نے انتہائی محنت‘ صبر‘ استقامت اور محبت سے پروان چڑھایاہے۔‘‘مرکزی اداکار احسن خان نے سوشل میڈیا پر اپنی آنے والی فلم ’’رہبرا‘‘کا ٹیزر شیئر کیا اور اپنے جذبات کا اظہار کرتے ہوئے کہا ’’غیر متوقع کی توقع‘ زندگی حیرت انگیز چیزوں سے بھری ہوئی ہے اور آپ کو حیران کرنے کا انتظار کر رہی ہے!‘‘’’رہبرا‘‘ 24 جون 2022کو پاکستان بھر کے سینما گھروں میں ریلیز کی جائے گی۔