چیئرمین پی سی بی نے کرکٹ کو نچلی سطح پر فروغ دینے کیلئے پلان طلب کرلیا

 لاہور(سپورٹس رپورٹر)پاکستان کرکٹ بورڈ کے چیئرمین محسن نقوی نے کرکٹ کو نچلی سطح پر فروغ دینے کیلئے قابل عمل پلان طلب کرلیا اس حوالے سے چیئرمین پی سی بی محسن نقوی نے ڈائریکٹر ڈومیسٹک کرکٹ کو ٹاسک دے دیا ہے۔ محسن نقوی نے کہا کہ سکول، کالج اور یونیورسٹی کی سطح پر ٹیلنٹ کی تلاش کیلئے جامع حکمت عملی ترتیب دی جائے، پاکستان بھر میں سکولز، کالجز اور یونیورسٹیز کے درمیان ٹورنامنٹ کے انعقاد کا پلان بنایا جائے۔ کرکٹ کے ٹیلنٹ کو سامنے لانے کیلئے نچلی سطح پر ٹورنامنٹ کا انعقاد ضروری ہے،  ملک بھر میں کالجز اور یونیورسٹیز لیول پر خواتین کے ٹورنامنٹ بھی کرائے جائیں، خواتین کو بھی کرکٹ کے یکساں مواقع فراہم کیے جائیں گے۔ پاکستان میں کرکٹ کا بے پناہ ٹیلنٹ موجود ہے، اس کو سامنے بھی لانا ہے اور نکھارنا بھی ہے۔چیئرمین پی سی بی محسن نقوی نے ابھرتے ہوئے نئے پلیئرز کی پروفائلنگ کی ہدایت بھی کی ہے۔