ساہیوال/ سرگودھا: پک اپ کی ٹکر سے 2 موٹر سائیکل سوار جاں بحق، ڈرائیور ساتھی سمیت زخمی

ساہیوال /سرگودھا(نامہ نگار) سرگودھا جھنگ روڈ پر پک اپ سے ٹکرانے پر 2 موٹر سائیکل سوار جاں بحق پک اپ ڈرائیور ساتھی سمیت زخمی۔ بتایا جاتا ہے کہ گزشتہ رات ساہیوال کے محلہ صادق آباد کا رہائشی محمد یار عرف یارا اپنے ساتھی شفقت کے ہمراہ موٹر سائیکل پر مہندی کی تقریب سے واپس آرہے تھے کہ سرگودھا روڈ تحصیل ہیڈ کوارٹر ہسپتال کے نزدیک پک اپ لوڈر نے پیچھے سے انہیں ٹکر مار کر بری طرح کچل دیا جس کے نتیجہ میں موٹر سائیکل پر سوار محمد یار اور اس کا ساتھی شفقت موقع پر ہی جاں بحق ہو گئے جبکہ پک اپ لوڈر بے قابو ہو کر ہسپتال گیٹ کے سامنے بجلی کے پول سے جا ٹکرائی جس کے نتیجہ میں ڈرائیور اور اس کا ساتھی شدید زخمی ہو گئے زخمیوں کو طبی امداد کیلئے ٹی ایچ کیو ہسپتال لایا گیا جہاں ابتدائی طبی امداد فراہم کرنے کے بعد انہیں سرگودھا ریفر کر دیا گیا۔