لاہور(سپورٹس رپورٹر)پاکستان باسکٹ بال فیڈریشن، سپورٹس بورڈ پنجاب اور پیک کے تعاون سے لاہور میں چھ روزہ انٹرنیشنل باسکٹ بال کوچنگ کورس آج سے لاہور کے نشتر سپورٹس کمپلیکس میں شروع ہوگا۔ 11 اگست تک جاری رہنے والے کوچنگ کورس میں 21 سال سے کم عمر کے کھلاڑی حصہ لے رہے ہیں، جنہیں غیر ملکی کوچز تربیت دینگے۔ پاکستان باسکٹ بال فیڈریشن کے سیکرٹری خالد بشیر کے مطابق کوچنگ کورس میں شرکت کرنے والے کھلاڑیوں پر لازمی ہوگا کہ وہ کورس میں شرکت کے وقت اپنا اصل شناختی کارڈ اور ب فارم ساتھ لائیں۔ ان کا کہنا تھا کہ کوچنگ کورس میں تربیت کے لیے غیر ملکی کوچز پاکستان آ رہے ہیں جو پاکستان باسکٹ بال کے فروغ کے لیے نوجوان کھلاڑیوں کو تربیت دینگے تاکہ کھلاڑیوں کو اس بارے میں آگاہی ہو سکے کہ میچز میں کس طرح کی حکمت عملی اپنانی ہے۔