انگلینڈ کرکٹ بورڈ سے مضبوط تعلقات کے خواہشمند ہیں : وسیم خان 

لاہور( سپورٹس رپورٹر+نمائندہ سپورٹس ) پاکستان کرکٹ بورڈ  کے چیف ایگزیکٹو وسیم خان نے کہا کہ پاکستان کرکٹ کیلئے یہ بہت جذباتی لمحات ہیں۔ جہاں ہم اپنی ذمہ داری نبھاتے ہوئے بین الاقوامی کرکٹ کا دوبارہ آغاز کررہے ہیں تو وہیں ہم اس وباء سے متاثرہ افراد کے ساتھ کھڑے ہورہے ہیں۔ ہم تمام متاثرین کے لواحقین سے دلی تعزیت اور ہمدردی کا اظہار کرتے ہوئے یقین دلانا چاہتے ہیں کہ پاکستان کرکٹ ہمیشہ ان کی حمایت کرتی رہے گی۔ اس ایک منٹ کی خاموشی کے ذریعے ہم وباء سے لڑنے والے ان صفِ ا ول کے سپاہیوں  کو بھی خراج تحسین پیش کرتے ہیں۔ پاکستان اور انگلینڈ کی  ٹیموں کا ایک منٹ کی خاموشی اختیار کرنا باہمی احترام کا مظہر ہے۔ اس سے قبل دونوں بورڈز کے تعلقات کبھی اتنے مضبوط نہیں رہے اوراب  ہم مستقبل میں اسے مزید فروغ دینے کے خواہشمند ہیں تاکہ ایک دوسرے کے تجربے ، علم اور مدد سے فائدہ اٹھاسکیں۔