پاکستان کے نائب وزیر اعظم اور وزیر خارجہ اسحاق ڈار او آئی سی اجلاس میں شرکت کے لیے آج شام جدہ روانہ ہوں گے۔ترجمان دفتر خارجہ ممتاز زہرہ بلوچ کے مطابق او آئی سی اجلاس اسلامی جمہوری ایران اور فلسطین کی درخواست پر بلایا جا رہا ہے۔ او آئی سی وزراء خارجہ ایگزیکٹو کمیٹی کا غیر معمولی اجلاس کل شام جدہ میں ہوگا، اجلاس کا ایجنڈا 2 نکاتی ہے۔
ممتاز زہرہ بلوچ کا کہنا تھا کہ اجلاس میں فلسطین اور دیگر علاقائی ریاستوں کے خلاف اسرائیلی جارحیت پر تبادلہ خیال ہوگا۔ فلسطینی کاز کے لیے پاکستان ہمیشہ بین الاقوامی فورمز پر آواز بلند کرنے میں سرفہرست رہا ہے۔انہوں نے بتایا کہ ایجنڈے میں پہلا آئٹم فلسطینی عوام کے خلاف قابض اسرائیل کے جرائم کا تسلسل ہے جبکہ دوسرا ایجنڈا آئٹم قابض اسرائیل کی ایران کے سالمیت کے خلاف جارحیت ہے۔ترجمان نے مزید کہا کہ اسحاق ڈار غزہ اور مشرق وسطیٰ کی ابتر صورتِ حال پر پاکستان کے تحفظات کا اظہار کریں گے۔ وزیر خارجہ امن کی فوری ضرورت اور غزہ کے لوگوں کو امداد کی فراہمی پر زور دیں گے۔