لاہور(سپورٹس رپورٹر) 34ویں چیمپئنز ٹرافی ہاکی ٹورنامنٹ کے کوارٹر فائنلز آج کھیلے جائیں گے۔ آسٹریلیا کے شہر ملبورن میں جاری میگا ایونٹ میں بدھ کو آرام کا دن تھا جبکہ چاروں کوارٹر فائنلز کھیلے جائیں گے۔ پہلا کوارٹر فائنل پاکستان اور جرمنی کے درمیان کھیلا جائے گا جو پاکستانی وقت کے مطابق صبح ساڑھے 7 بجے شروع ہوگا۔ دوسرا کوارٹر فائنل ہالینڈ اور نیوزلینڈ کے درمیان کھیلا جائے گا۔ تیسرے کوارٹر فائنل میں بھارت اور بیلجیئم کی ٹیمیں مدمقابل ہوں گی۔ چوتھا کوارٹر فائنل میزبان آسٹریلیا اور انگلینڈ کے درمیان کھیلا جائے گا۔ 7 دسمبر کو آرام کا دن ہوگا جبکہ سیمی فائنلز اور کلاسیفکیشن میچز 8دسمبر کو کھیلے جائیں گے۔ 9 دسمبر کو پانچویں اور ساتویں پوزیشن کے میچز کھیلے جائیں گے جبکہ اسی روز تیسری اور چوتھی پوزیشن کے مقابلے بھی ہوں گے۔ 9 دسمبر کو ایونٹ کا فائنل کھیلا جائے گا۔