گڑھاموڑ: مسافر کوچ اور کار میں تصادم،2 خواتین سمیت 3افراد جاں بحق

وہاڑی ،گڑھا موڑ(کرائم رپورٹر ،نامہ نگار، نمائندہ خصوصی) مسافر کوچ اور کار میں تصادم،2 خواتین سمیت 3افراد جاں بحق تفصیل کے مطابق ملتان روڈ پر اڈہ 86 کے قریب تصادم ہوا ہے کار سوار تین مسافر موقع پر جاں بحق ہوگئے جبکہ ایک کار سوار، مسافر کوچ کے14 سے زائد مسافر شدید زخمی ہوگئے۔ جاں بحق ہونے والے کارسواروں میں ٹنڈوآدم حیدرآباد کا رہائشی 48 سالہ جنگ شیر ،ملتان کی رہائشی 30 سالہ ساجدہ اسلم زوجہ محمد اسلم اور ملتان کی رہائشی 3 سالہ مقدس اسلم دختر محمد اسلم شامل ہیں جبکہ ملتان کی رہائشی 45 سالہ رشیدہ زوجہ شبیر کو تشویشناک حالت میں ڈی ایچ کیوہسپتال سے نشترہسپتال ملتان ریفر کردیا گیاہے۔ مسافر کوچ وہاڑی سے ملتان اور کار ملتان سے وہاڑی کی طرف جارہی تھی ریسکیو 1122 ور پولیس کی امدادی ٹیموں نے جائے حادثہ پر امدادی کاروائیاں کرتے ہوئے زخمی اور جاں بحق ہونے والے کو ہسپتال منتقل کیا ۔ڈی پی او ظفر بزدار بھی جائے حادثہ پر پہنچے اور امدادی کاروائیوں کی نگرانی کی جبکہ ٹریفک کی روانی کو یقینی بنایا۔