جہانیاں‘ خانیوال (نمائندہ نوائے وقت‘ نامہ نگار، نیوز رپورٹر) مشیر وزیر اعلی ایاز خان نیازی کی خصوصی کوششوں سے زبیدہ لیڈیز پارک کو فیملیز کے لئے کھول دیا گیا۔ڈپٹی کمشنر عمر افتخار شیرازی نے اسسٹنٹ کمشنر محمد اکمل چوہدری کے ہمراہ تزئین و آرائش کے بعد مکمل ہونے والے پارک کا افتتاح کیا۔ڈپٹی کمشنر کا میڈیا سے گفتگو کرتے ہوئے کہنا تھا کہ جہانیاں سمیت ضلع بھر میں ریکارڈ ترقیاتی کام جاری ہیں ٹی ایچ کیو ہسپتال میں ڈائلیسز وارڈ اور ٹراما سنٹر تعمیر کے پراجیکٹ شروع کرنے کے لئے بھی منصوبہ بندی شروع کردی ہے۔انہوں نے مزید کہا کہ واٹر فلٹریشن پلانٹس سمیت دیگر پراجیکٹس بھی جلد دیکھنے کو ملیں گے ٹھٹہ صادق آباد میں گرلز ایسوسی ایٹ کالج کے لئے بھی ورکنگ شروع کردی گئی ہے ڈپٹی کمشنر عمر افتخار شیرازی نے افسران کے ہمراہ بس اسٹینڈ جہانیاں کا بھی دورہ کیا اور ٹی ایچ کیو ہسپتال میں ٹراما سنٹر اور ڈائلیسز وارڈ کے قیام کے حوالہ سے بھی انتظامیہ سے مشاورت کی۔ انہوں نے ٹی ایچ کیو ہسپتال میں طبی سہولیات کا بھی جائزہ لیا۔