لاہور+اسلام آباد (نیٹ نیوز+خبر نگار خصوصی) نامور کلاسیکل گلوکار حسین بخش گلو لاہور میں انتقال کرگئے۔ گلوکار استاد حسین بخش گلو طویل عرصے سے بیمار تھے۔ ان کی عمر 75 سال تھی۔ حسین بخش گلو کلاسیکی موسیقی کے مشہور شام چوراسی گھرانے سے تعلق رکھتے تھے۔ استاد حسین بخش گلو لاہور میں الحمرا اکیڈمی آف پرفارمنگ آرٹس سے وابستہ تھے۔صوبائی وزیر اطلاعات و ثقافت عامر میر نے حسین بخش کی وفات پر اظہار افسوس کرتے ہوئے کہا ہے کہ حسین بخش کی کلاسیکل موسیقی کے شعبے میں خدمات پر انہیں بھرپور خراج عقیدت پیش کرتا ہوں۔نگران وفاقی وزیر اطلاعات، نشریات و پارلیمانی امور مرتضیٰ سولنگی نے برصغیر کے نامور گلوکار استاد حسین بخش خان گلو کے انتقال پر گہرے دکھ اور افسوس کا اظہار کیا۔ وزیر اعلیٰ پنجاب محسن نقوی اور وزیر اطلاعات عامر میر نے بھی گہرے دکھ اور افسوس کا اظہار کیا۔