اسلام آباد (خبرنگارخصوصی) اسلام آباد ماڈل کالج برائے طالبات ایف سیون فور میں بزم فکر اقبال کے چھٹے یوم تاسیس کے موقع پر تقریب منعقد کی گئی جس میں ملک کی مایہ ناز اقبال شناس شخصیات، ماہرین اردو اور فارسی زبان وادب نے شرکت کی۔ کالج ہذا کی پرنسپل ڈاکٹر سعدیہ عزیز نے بزم فکر اقبال کے صدر ڈاکٹر محمد قمر اقبال، ڈاکٹر راشد حمید (اقبال شناس)، ڈاکٹر طالب حسین سیال (ماہر اقبالیات)، ڈاکٹر مظفر علی کاشمیری (ماہر فارسی زبان و ادبیات اور شارح کلام اقبال فارسی) اور ڈاکٹر شیر علی (ماہر اردو زبان وادب) کو تقریب میں شرکت پر خراج تحسین پیش کیا۔ ڈاکٹر سعدیہ عزیز نے کہا کہ اس طرح کی تقریبات تعلیمی اداروں کی شان بڑھاتی ہیں اور طلبہ وطالبات کے ساتھ اساتذہ کرام کو بھی سیکھنے کا موقع ملتا ہے- تقریب کے اختتام پر پرنسپل نے مہمانوں کو تحائف بھی پیش کیے۔