نامور شاعر شہزاد اظہر کے انتقال پر صدر نشین اکادمی ادبیات کا اظہار تعزیت

اسلام آباد (وقائع نگار)اکادمی ادبیات پاکستان کی صدر نشین پروفیسر ڈاکٹر نجیبہ عارف اور ڈی جی سلطان ناصر نے نامور شاعر،ادیب اور نقاد شہزاد اظہر کے انتقال پر گہرے رنج و غم کا اظہار کیا۔شہزاد اظہر کئی ماہ سے علیل تھے علالت سے قبل وہ راولپنڈی اسلام آباد کے ادبی حلقوں میں ایک فعال ادبی شخصیت جانے جاتے تھے۔ ان کی اہم شعری تصنیفات میں "لہو کے ریشم سے" اور "پل کی سلوٹ پہ" قابل ذکر ہیں۔ زاویہ اور زندہ لوگ کے زیر اہتمام اور اکادمی ادبیات پاکستان کے تعاون سے 30 نومبر 2023 کو مرحوم کے نظمیہ شعری مجوعے "پل کی سلوٹ پہ" کی تقریب رونمائی بھی منعقد ہوئی۔صدر نشین اکادمی پروفیسر ڈاکٹر نجیبہ عارف اور ناظم اعلی سلطان ناصر نے مرحوم کےلیے مغفرت اور ان کے پس ماندگان کےلیے صبر جمیل کی دعا کی۔