کراچی: فائرنگ بچے سمیت 3 افراد جاں بحق، ڈاکوئوں سے مقابلہ تھانیدار زخمی

کراچی (کرائم رپورٹر) شہر قائد میں اتوار کے روز فائرنگ اور تشدد کے واقعات میں بچے سمیت 3 افراد جاں بحق جبکہ ڈاکوئوں سے مقابلے میں ایس ایچ او شدید زخمی ہوگیا۔ تفصیلات کے مطابق لانڈھی کے علاقے میں ہسپتال چورنگی کے قریب نامعلوم افراد کی فائرنگ سے ایک بچہ جس کی شناخت نہیں ہوسکی جاں بحق ہوگیا، نعش جناح ہسپتال منتقل کردی گئی۔ دریں اثناء پرانا گولیمار کے علاقے میں فائرنگ کرکے 45 سالہ ناصربہرام اور سرجانی ٹائون میں 40 سالہ نامعلوم شخص کو قتل کردیا گیا۔ شاہ لطیف ٹائون کے علاقے میں پولیس مقابلے کے دوران 2 ڈاکو گرفتار ہوئے جبکہ گولیاں لگنے سے مقامی ایس ایچ او شدید زخمی ہوگیا۔ رضویہ پولیس نے پولیس اور رینجرز پر حملوں کے 2 ملزموں عرفان اللہ عرف عرفانی اور ذاکر مسعود عرف لاڈلا کو گرفتار کرکے اسلحہ اور دستی بم برآمد کرلیا۔ علاوہ ازیں لیاقت آباد انڈر پاس کے قریب مقابلے میں ڈاکو زخمی حالت میں گرفتار کرلیا گیا۔