بھارتی عزائم سے علاقائی سلامتی کو خطرہ ، ٹیررفنانسنگ کا معاملہ اٹھائیں گے: شاہ محمود

اسلام آباد (خصوصی نامہ نگار) وزیر خارجہ مخدوم شاہ محمود قریشی نے کہا ہے کہ بھارت کی ٹیرر فنانسنگ کا معاملہ عالمی سطح پر اٹھائیں گے۔ امید ہے ٹھوس شواہد کی بنیاد پر دنیا  اسکا  نوٹس لے گی۔ پیر کو بھارت سرکار کے منفی عزائم اور علاقائی سلامتی کو درپیش خطرات کے حوالے سے  جاری کئے گئے ایک بیان میں وزیر خارجہ نے کہا کہ بھارت کی مقبوضہ کشمیر پالیسی بری طرح ناکام ہوئی، کشمیری قیادت، بھارت سرکار سے نالاں دکھائی دے رہی ہے۔ کشمیری رہنماؤں نے وزیر اعظم مودی کے ساتھ ہونے والی حالیہ ملاقات میں 5 اگست 2019 کے یکطرفہ اور غیر آئینی اقدامات پر نظر ثانی کا مطالبہ کیا ہے۔شاہ محمود قریشی نے کہا کہ بھارت کی ٹیرر فنانسنگ کا معاملہ عالمی سطح پر اٹھائیں گے۔ قبل ازیں بھی بھارت کی دہشت گردی کے واضح ثبوت ڈوزیئر کی صورت میں اقوام متحدہ اور عالمی برادری کے سامنے پیش کر چکے ہیں۔ انہوں نے کہا کہ بھارت کے منفی عزائم سے علاقائی سلامتی کو خطرات ہیں۔انہوں نے کہا کہ دنیا دہشت گردی کی مالی معاونت کی بیخ کنی چاہتی ہے۔ انہوں نے کہا کہ جوہر ٹاؤن لاہور میں ہونے والے دہشت گردی کے واقعہ کی تحقیقات میں، سامنے آنے والے ٹھوس شواہد کی بنیاد پر اب پاکستان یہ توقع کر رہا ہے کہ دنیا بھارت کی ا س ٹیرر فنانسنگ کا نوٹس لے گی۔ ہم دہشت گردی کی روک تھام اور اپنی سرحدوں کی حفاظت کیلئے ہر ممکن اقدامات اٹھا رہے ہیں۔شاہ محمود قریشی نے کہا کہ ہم نے سرحد پر باڑ لگائی ہے۔ ہم نے اپنے قبائلی علاقوں کو دہشت گردوں سے پاک کیا ہے، ہم نے وہاں ترقیاتی کاموں کا آغاز کیا ہے۔ افغان مہاجرین کے حوالے سے وزیر خارجہ نے کہا کہ ہم افغان مہاجرین کی باعزت وطن واپسی کے خواہشمند ہیں، اس مقصد کیلئے ہمیں عالمی برادری کی مدد درکار ہو گی، افغان مہاجرین کی وطن واپسی کیلئے، ایک مقررہ مدت اور جامعیت کا حامل، وافر وسائل والا منصوبہ تشکیل دیا جانا چاہیے اور اسے افغان امن عمل کا حصہ بنایا جانا چاہیے۔ وزیر خارجہ نے کہا کہ اگر افغانستان میں اس منفی سوچ کے ساتھ بدامنی پھیلائی جاتی رہی کہ پاکستان’’ ٹو فرنٹ‘‘ (دو سرحدوں پر کشیدگی کی) صورت حال میں الجھا رہے تو یہ عالمی مقاصد کے منافی ہو گا، دنیا کو اس صورت حال کا نوٹس لینا چاہیے۔