لاہور ( سپورٹس ڈیسک) ویسٹ انڈیز کرکٹ ٹیم کے لیجنڈ کرکٹر شیونارائن چندرپال کو امریکا کی ویمنز کرکٹ ٹیم کا ہیڈ کوچ مقرر کردیا گیا ہے، 47 سالہ چندرپال نے اکیس سالہ بین الاقوامی کیریئر کے دوران ویسٹ انڈیز کی جانب سے 164 ٹیسٹ میچ کھیل کر 11867 رنز سکور کئے ہیں۔ امریکی ویمنز کرکٹ ٹیم کا ہیڈ کوچ مقرر ہونے کے بعد شیونارائن چندرپال کا کہنا ہے کہ مجھے خوشی ہے کہ یہ ذمہ داری مجھے دی گئی ہے، میں ہمیشہ سے خواتین کے کھیلوں میں شمولیت کا حامی رہا ہوں، میں امریکی ویمنز ٹیم کی کوچنگ ملنے پر خوش اور پرجوش ہوں، امریکہ اس وقت انٹرنیشنل کرکٹ کونسل کا ایسوسی ایٹ ممبر ہے جبکہ امریکی ویمنز کرکٹ ٹیم کی اس وقت عالمی درجہ بندی میں 28 ویں پوزیشن ہے،  ٹیم کی بہتری کیلئے جو ممکن ہوسکا کروں گا۔